ILOILO CITY – Nagdepensa ang Department of Education- Schools Division of Antique sa pag-reinstate sa ginareklamo nga principal nga si Mrs. Venus Divinia Nietes sa Laua-an National High School.
Masobra 500 nga mga estudyante kag kapin 20 ka mga manunudlo ang nagpatigayon sang hublag-protesta sa atubang mismo sang buluthuan agud ipabutyag ang ila disgusto sa pagdumala ni Nietes bangud sa ginaalegar pagpang-bully, pagpamahog kag pag-abuso sa iya posisyon.
Sa interview sang Bombo Radyo kay Atty. Elizabeth Felasol, legal officer III sang Schools Division of Antique, iya ginpahayag nga gintawag sang Civil Service Commission ang ila atensyon sang gin-assign si Nietes sa division office.
Gin-assign sa division office ang ginareklamo nga principal agud nga indi na magdako kuntani ang problema.
Suno kay Felasol, ginsunod lamang nila ang direktiba sang Civil Service Commission bangud nga kun indi nila ini pagsundon, mabalikan man ang schools division superintendent.
Pahayag niya, nagapadayon ang ‘grievance machinery procedure’ apang indi ini makapat-od kun san-o matapos.
Samtang, ginpahayag niya nga base sa Civil Service Commission, ang mga manunudlo ang indi mahimo nga magpatigayon sang hublag protesta.
Wala sang may nakita nga problema ang Education Program Supervisor sang Department of Education- Schools Division of Antique sa iya pagpadulong sa Laua-an National High School kun sa diin ginareklamo ang principal nga si Mrs. Venus Divinia Nietes bangud sa ginapahayag pagpang-bully, pagpamahog kag pag-abuso sa iya posisyon.
Sa interview sang Bombo Radyo kay Rizalina Sebuan, iya ginpahayag nga ang mga estudyante ang yara sa sulod sang classrooms kag nagapadayon sa pagtudlo ang mga manunudlo.
Suno kay Sebuan, wala sang anuman nga agi ukon senyales nga may natabo nga tensyon.
Pahayag niya, sa 990 nga enrollees sang eskwelahan, 708 ang present sang amo nga tion.
Base sa pag-tsekyar niya sa mga advisers, ang rason sang mga estudyante sa ila pag-absent amo nga nagamasakit sila, may nagasuprer sang sore eyes, kag may yara sang personal nga problema sa pamilya.
Apang gin-ako niya nga may walo ka mga kabataan nga wala na nagbalik sa eskwelahan bangud nga nakulbaan.
