Nakaluwas sa kamatayon ang 58-anyos nga lalaki sa Estados Unidos sang Amerika matapos nangin madinalag-on ang ginhimo sang mga doktor nga pagsaylo sang korason sang baboy sa lawas sang amo nga lalaki.
Ang pasyente amo si Lawrence Faucette, isa ka Navy veteran kag residente sang Frederick, Maryland.
Ginbalikan ni Faucette ang tyempo kun sa diin ang iya option amo ang xenotransplant ukon ang pagbaton niya sang organ halin sa sapat — ukon sa sini nga kaso, heart sang baboy.
:max_bytes(150000):strip_icc():focal(1014x770:1016x772):format(webp)/Pig-Heart-Transplant-092523-02-b3f89eca136443ab86949cba895d426d.jpg)
Suno sa Navy veteran, ginkapyutan niya ang gamay kaayo nga tyansa kag wala gid siya nagsala sa desisyon bangud kasunod sang madinalag-on nga transplant, maka-ginhawa na siya sang maayo, matalunsay na ang pitik sang iya korason, kag naga-gana ini nga wala nagakinahanglan sang supportive device.
Ang gina-inom lang sini subong amo ang conventional anti-rejection drugs amo man ang bag-o nga antibody therapy agud nga punggan ang iya lawas nga i-damage ukon i-reject ang bag-o nga organ.
Ang operasyon kay Faucette ang ginpangunahan sang mga eksperto kag mga doktor halin sa University of Maryland School of Medicine. Ang amo man nga team ang nagpatigayon sang labing-una nga transplant sang korason sang baboy sa tawo sang nagligad nga tuig.
Sang amo nga tion, duha ka bulan pa nga nagkabuhi ang 57-anyos nga pasyente nga si David Bennett matapos ang transplant apang napatay man bangud maluya na nga daan ini antes pa man ang operasyon.
Ang xenotransplant sa USA amo ang ginalantaw nga makahatag sang solusyon sa chronic shortage sang human organ donations. Nahibaluan nga sa subong, masobra 100,000 ka Americans ang nagahulat para sa organ transplants. #
