ILOILO CITY- May ginauyatan na ang Philippine National Police nga pangalan sang mga indibidwal nga posible amo ang mastermind sa likod sang natabo nga inside job ukon “hijack me” sa duha ka mga wing van nga nagaunod sang 1000 tanan ka sako sang kalamay sa Negros Occidental.
Ini matapos nag-ako ang duha ka mga drivers sang wing van nga sanday Jojit Arceño sang Pototan, Iloilo kag John Michael Olegen sang Cadiz City, Negros Occidental nga naghimo-himo lang ang mga ini sang istorya.
Base sa nauna nga panaysayon sang duha, samtang yara sila sa area sang La Carlota City, ginparahan sila sang lima ka mga indibidwal nga nagpakilala nga sugar mill workers rason nga ginpasakay nila ini sa truck apang hinali lang nagdeklarar sang hold-up tubtob nga ginbuslan sila sa pagmaneho kag gin-blindfold, ginhigtan sa kamot kag tiil kag ginsaylo sa likod sang truck, ginkuha ang ila mga karga nga kalamay tubtob nga ginbilin ang duha ka trucks Murcia.
Sa interview sang Bombo Radyo kay LtCol Jay Malong, hepe sang Bago City Police Office, iya ginpahayag nga sa ila interogasyon, nagtuad ang duha nga sila mismo ang may nakatransaksyon nga isa ka indibidwal nga residente sang Negros Occidental.
Suno kay Malong, posible nga nakareserve na ang warehouse sa Bago City kun sa diin ginbilin ang isa ka libo nga sako sang kalamay nga nagabalor sang P3 million.
Nahibaluan nga madasig nga na-trace ang gindal-an sang mga kalamay bangud nga may GPS (Global Positioning System) ang wing vans.
Gin-ako naman sang duha ka drivers nga P300,000 kada isa ang bayad sa ila sa amo nga modus.
Suno pa kay Malong, sa subong, apat ka mga indibidwal ang ara sa ila kustodiya nga ginakabig nga principal suspects kalakip na ang duha ka drivers.
Gindugang man ni Malong nga ginakabig naman subong nga persons of interests ang tanan nga na-involve sa transaksyon.
