ILOILO CITY – Liwat nga siraduhon ang Ungka flyover sa tion nga magsugod na ang pagkay-o sini.
Sa interview sang Bombo Radyo kay Engr. Sanny Boy Oropel, officer-in-charge sang Department of Public Works and Highways Region VI, iya ginpahayag nga manug-abot na ang P100 million nga initial nga budget para sa rectification activity sa Ungka flyover.
Suno kay Oropel, sa tion nga mag-abot na ang initial budget, iga-schedule na ang procurement activity.
Unahon nga kay-uhon suno sa iya ang piers 4, 5, kag 6.
Pahayag niya, sa tion nga magsugod na ang rectification activity, liwat nga ipasarado ang flyover.
Gin-athag sang opisyal nga samtang wala pa nagsugod ang pagkay-o sang flyover, magapabilin ini nga bukas para sa mga light vehichles.
Sa subong suno sa natungdan, indi pa mahibaluan kun pila ang kinahanglanon nga budget para sa rectification sang bilog nga flyover bangud nga nagapadayon pa ang pag-estimate.
Gin-athag sang Department of Public Works and Highways Region VI nga mahimo nga magpasakup sa bidding sa pagkay-o sang Ungka flyover ang sin-o man nga contractor nga kwalipikado.
Suno kay Oropel, officer-in-charge sang talatapan, iya ginpahayag nga kwalipikado nga magpasakup sa bidding ang contractor nga may eksperyensya sa pagkay-o sang taytay.
Pahayag niya, indi mahimo nga malimitahan sang ahensya kun sin-o lamang nga contractor ang mahimo nga makapasakup.
Nahibaluan nga ang International Builder’s Corporation ang contractor nga nagdaog sa bidding sa pagkay-o sang Ungka flyover lakip na ang Aganan kag Hibao-an flyover.
Gin-athag naman sang opisyal nga wala siya sang otoridad sa paghambal kun sin-o ang dapat nga manabat sa palpak nga istruktura bangud nga indi man siya suno sa iya involved sang una nga ubra.
