Posible nga maglawig pa tubtub sa bulan sang Oktubre ang pagpatuman sang price ceiling nga P41 kada kilo sa regular milled rice kag 45 kada kilo sa well-milled rice.
Suno kay Agriculture Undersecretary Domingo Panganiban, may rekomendasyon na nga napasaka kay President kag Agriculture Secretary Ferdinand Marcos, Jr. apang wala pa sang napaguwa nga desisyon kun aprubado na ang amo nga proposal.
Pahayag pa ni Panganiban, mahimo magpabilin ang price cap bisan pa nga mag-umpisa na ang tag-alani sang humay ukon tubtub nga magbalik sa P38 kada kilo ang retail price sang bugas.
Mahimo man ini magpabilin suno sa iya samtang nga nagabulig ini sa mga konsumidor.
Septyembre 5 sang ginpatuman ang price cap kag sandig sa inisyal nga plano, ipatuman lamang ini sa sulod sang isa ka bulan.
May yara man sang P15,000 nga cash assistance nga ginhatag sa rice retailers nga apektado sang price ceiling. Apang gin-ako ni Panganiban nga subong, wala pa sang desisyon kun padayunon ang pagpanagtag sang ayuda pananglitan magapadayon man ang pagpatuman sang price ceiling.
Ini nga pahayag ni Panganiban ang baliskad sa una ginpahayag ni National Economic and Development Authority (NEDA) chief Arsenio Balisacan nga malapit na lang bawion ang price cap bangud madamo na ang naga-ani sang humay sa bulan sang Oktubre.
