Nagtumbo sa kalipay ang Filipino professional boxer nga si Eumir Marcial matapos nakasulod na sa semifinals sang men’s 80kg weight class sa boksing sa 19th Asian Games!
Sigurado naman nga makadala si Marcial sang bronze medal sa pagpauli sa Pilipinas matapos sini gintumba ang kasumpong nga si Weerapon Jongjoho sa second round sa quarterfinals.
Antes ang knockout, duha-duha ang kadalag-an para kay Marcial matapos nga nalutos ini sa first round bangud sa nagtagasak nga pagtupa sang sumbag sang iya kasumpong sa iya nga nawong nga rason nga gin-isipan siya sang referee sang walo ka segundos.
Gin-ako ni Marcial nga nagpakuno-kuno lamang siya nga masarangan niya ang kusog ni Jongjoho agud nga indi pag-untaton ang sambuwa, apang sa pagkamatuod suno sa iya, nahilo siya sang nagtupa ang inumol sini sa sentro gid sang iya nga nawong. Indi hamak nga mas mataas kag mas daku ang Thai suno pa kay Marcial.
Pag-abot sa second round, ginsiling sang Pinoy boxer nga samtang nagalantaw siya sa oras, ibubo na niya ang tanan kag tumbahon ang iya Thai opponent.
Makit-an kun paano sini gin-set up kag ginpeke ang straight punch, nakapangita sang tyempo kag ginpatupa ang right hook nga nagtumba kay Jongjoho 14 segundos ang nabilin sa second round.
Bronze medalist si Marcial sa Tokyo Olympics sang 2021 kag bronze medalist man sa men’s 75kg sa Asian Games 2018 apang mas mataas nga weight class ang gin-intrahan sini subong nga edisyon sang Asiad.
Sunod nga atubangon ni Marcial si Ahmad Ghousoon sang Syria sa semis.
Nahibaluan nga ang finalists lamang sa 80kg class sa Asiad ang makakuha sang pwesto para sa Paris Olympics sa 2024. #
