Sigurado na nga makahampang sa 2024 Paris Olympics ang 23-anyos nga Filipino gymnast superstar nga si Carlos Edriel “Caloy” Yulo matapos ang kadalag-an sa 2023 World Artistic Gymnastics Championships sa Antwerp, Belgium.
Nakuha ni Yulo ang ticket padulong sa Paris sang nangin highest-ranked eligible athlete ini sa iya nga pet event floor exercise.
Photo Courtesy: Olympics/Website
Pangatlo si Yulo sa amo nga event matapos nakatipon sang 14.600 points nga nagasunod kanday Artem Dolgopyat sang Israel (15.100) kag Fred Richard sang USA (14.600).
Pareho nga kuwalipikado na sanday Dolgopyat kag Richard sa Paris Games, gani si Yulo ang sunod nga best athlete nga ginhatagan sang slot sa Olympics.
Sa subong, si Yulo pa lang kag ang Asian Games gold medalist nga si EJ Obiena ang sigurado nga makatiglawas sang Pilipinas sa Paris 2024. Hungod nga wala nagpasakop si Yulo sa 19th Asian Games kag ginpasulabi ang 2023 Artistic Gymnastics World Championships nga isa ka qualifying tournament para sa Olympiada sa masunod nga tuig.
