Tuyo sang Filipino Olympian nga si Carlo Paalam nga maupdan ang isa pa ka Pinoy Olympian nga si Eumir Marcial sa semifinals subong nga Asian Games apang indi basta-basta ang iya agyan subong nga adlaw.
Photo: REUTERS/Ueslei Marcelino
7:30 karon sa gab-i, atubangon ni Paalam ang reigning world champion nga si Abdumalik Khalokov sang Uzbekistan sa quarterfinal round sa Hangzhou gymnasium.
Ini ang labing-una nga tion nga nagsaka si Paalam sa men’s 57kg weight class sa boxing.
Sang Tokyo Olympics 2020 sang nangin silver medalist si Paalam, nag-compete lamang ini sa men’s 52kg apang kinahanglan niya nga magsaka sa mas mataas nga weight class bilang preparasyon sa Paris Olympics sa 2024.
Pananglitan malutos ni Paalam ang world champion kag siya ang maga-abanse sa semifinals, sigurado na ang iya bronze medal sa Asian Games nga pareho man kay Marcial.
Duha lamang ka finalists sa kada weight category ang makakuha sang ticket para sa Olympic Games sa Paris.#
