ILOILO CITY- Pasado na sa first reading sang Iloilo City Council ang Gang Prevention Ordinance nga ginduso sang chairman sa Committee on Youth and Sports Development.
Sa interview sang Bombo Radyo Iloilo kay Councilor Leila Luntao, chairman sang nasambit nga komitiba, iya ginpahayag nga kabahin sang ginaduso niya nga ordinansa ang pagdumili sa pag-organisa sang mga street gangs kag recruitment sini sa mga menor de edad.
Suno kay Councilor Luntao, madamo nga mga insidente sa siyudad ang makabig nga alarming.
Paathag sang konsehal, kabahin sa mga gin-report sang mga barangay officials amo ang involvement sang mga menor de edad sa mga kinagamo kag pang-vandalized sa palibot sang siyudad.
Kabahin naman sa ubrahon sa ordinansa ang paghatag sang nagakaigo nga kahulugan sa tinaga nga “gang” agud makabulig sa mas mahapos nga pag-identify sang kapulisan.
Ini bangud nga ang ginakabig nga gang sang kapulisan amu ang mga grupo nga nagahimu sang mga organized crimes.
Gin-refer naman sa Committee on Youth and Development kag Committee on Police Matter ang proposed ordinance.
