ILOILO CITY- Ginpangalanan na sang Iloilo Police Provincial Office ang duha ka persons of interest sa paghaboy kag pagpalupok sang granada sa municipal library sang Dingle, Iloilo.
Ini amo sanday Private First Class Romil Hulleza kag Staff Sergeant Calpasy Olli nga pareho nga assigned sa 6th Forward Service Support Unit sang Philippine Army.
Sa interview sang Bombo Radyo kay PCol Ronaldo Palomo, direktor sang Iloilo Police Provincial Office, iya ginpahayag nga na-capture sa closed circuit television camera ang duha kun sa diin naka-uniporme pa ang isa sa ila.
Suno kay Palomo, ila ginalantaw ang anggulo nga may dumot si Staff Sergeant Olli sa isa ka personnel sang Philippine National Police nga naka-duty sa Comelec checkpoint nga nag-isyu sang tiket sa iya bangud sa paglapas sa municipal ordinance.
Gilayon naman nga nagpatigayon sang imbestigasyon ang Philippine Army apang hugot nga ginpanginwala sang duha ang akusasyon.
Ginpaidalom naman ang mga ini sa restrictive custody sa military camp sa Dingle.
