Padayon ang imbestigasyon sang Cabatuan Municipal Police Station sa identity sang tatlo ka mga lalaki nga nag- hold up sa isa ka gasolinahan sa Cabatuan.
Sa interview sang Bombo Radyo kay P/Captain Dionisio Estacio, hepe sang Cabatuan Municipal Police Station, iya ginpahayag nga base sa ila pagpangusisa, matapos nagpatughong ang tatlo ka mga lalaki,nagdeklarar ang mga ini sang hold-up, gintayaan sang pusil ang cashier kag gintaban ang balor nga P20,000 pesos kag napalagyo sakay sa motorsiklo padulong sa banwa sang Janiuay.
Suno kay Estacio, base sa kuha sang Closed-Circuit Television Camera (CCTV),nagasuksok sang helmet ang duwa kag ang isa ang naka- facemask lang.
Dugang ni Estacio, duwa ang nagabantay sang gasolinahan sang amo nga tion nga amo ang gasoline girl kag isa ka cashier.
Wala naman natumod sang cashier kun ano nga klase sang pusil ang gintaya sa iya.
Sa subong, gina-check pa sang otoridad ang iban nga kuha sang Closed-Circuit Television Camera (CCTV) sa iban pa nga barangay para sa makabulig sa imbestigasyon.
