ILOILO CITY – Ang presensya sang foreign object sa utok sang tawo ang may yara sang malain nga epekto.
Apang dako nga katilingalahan ang kaso sang isa ka 80 anyos nga babayi sa Sakhalin region sa Russia kun sa diin, nadiskubrehan sini nga may yara gali sang 3 cm nga dagom sa wala nga bahin sang iya nga utok.
Sang damlag lang, ginpagwa sang Sakhalin Ministry of Health ang computed tomography (CT) scan results sang babayi.
Kun basehan ang edad sang babayi, nagapati ang mga doktor nga ang dagom ang ginbutang sa iya utok sang iya man lamang ginikanan sang ini ang ginbun-ag.
Indi man mapatihan pero ang amo nga practice ang indi na bag-o sa Russia.
Ang mga ginikanan nga indi makasarang sa pagsagod sa ila mga anak sang tyempo gyera ang naga-insert sang dagom sa utok sang mga lapsag pinaagi sa fontanelle agud nga mapatay ang mga ini kag wala sang ebidensya nga mabilin.
Indi pa klaro kun paano na-survive sang 80 anyos nga babayi ang tuyo nga pagpatay sa iya sang iya ginikanan.
Sa sulod sang 80 ka tuig, wala sang may nabatyagan nga ano man nga sakit sa ulo ang babayi.
Sa subong, wala na sang plano pa ang mga doktor nga ipaidalom sa operasyon ang babayi agud nga makuha dagum bangud nga delikado na ini para sa iya.
