Mahatagan liwat sang tyansa ang Pinoy boxer nga si Jerwin Ancajas nga mabawi ang iya nga titulo nga world champion sa iya pag-atubang sa World Boxing Association bantamweight champion nga si Takuma Inoue sa Nobyembre 15 sa Ryogoku Kokugikan Arena sa Tokyo, Japan.
Si Takuma amo ang manghod sang pound-for-pound king nga si Naoya Inoue nga isa ka boxing superstar sa Japan.
Photo: Getty Images/AFP
Ini ang ikaduha nga tion nga tinguhaan ni Ancajas nga makuha ang world title matapos nga nalutos sa kamot sang Argentine nga si Fernando Martinez sang Pebrero 2022 sang yara pa lang sa super flyweight.
Nalutos man ang Pinoy boxer kay Martinez paagi sa unanimous decision sa ila nga rematch walo ka bulan matapos ang una nga pagkit-anay sa ring.
Ang sambuwa sa Nobyembre 15 amo ang una nga tion nga nagsaka sang weight class ang 31-anyos nga Filipino pride halin sang napaslawan ini nga mabawi ang iya nga world champion status.
Preska si Ancajas gikan sa paglutos sa Colombian boxer nga si Wilner Soto sa super bantamweight paagi fifth-round stoppage sa Minneapolis, Minnesota.
Si Inoue naman ang naga-uyat sang rekord nga 18-1, 4 knockouts kag nakalutos sa lima ka Filipino fighters apang wala pa ini nakaagi-atubang sa kalibre ni Ancajas nga naka-depensa sa iya super flyweight strap sang siyam ka beses halin sang 2017 tubtub sang 2021.
