Gin-anunsyo sang International Testing Agency (ITA) nga nagpositibo ang naturalized player sang Pilipinas nga si Justin Brownlee sa paggamit sang ginadumilian nga droga sang naghampang ini sa 19th Asian Games sa Hangzhou, China.
Suno sa amo nga testing agency nga naka-base sa Switzerland, nakolekta ang sample sa in-competition anti-doping control sa Asiad sang Oktubre 7, 2023.
Ang ginatumod nga droga amo ang Carboxy-THC, isa ka substance nga nalakip sa mga ginadumilian sang World Anti-Doping Agency.
Ginpahayag pa nga napahibalo na si Brownlee sa amo nga resulta kag may kinamatarong nga mag-request sang analysis sa B-samples.
Photo: PSC/Media Pool
Si Browlee amo ang naghakwat sang team sang Pilipinas agud nga makuha ang kampyonato sa men’s basketball sa Asiad sa labing-una nga tion sa sulod sang 61 ka tuig.
Sa final match sang Pilipinas batok sa Jordan kun sa diin 70-60 ang skor pabor sa Gilas, nagbubo si Brownlee sang 20 puntos kag 10 rebounds.
Gin-anunsyo man sang testing agency nga magluwas kay Browlee, nag-positibo man sa test ang player sang Jordan nga si Sami Bzai.
Pareho nga ginkuha ang samples nanday Brownlee kag Bzai isa ka adlaw matapos ang gold medal match kun sa diin suno sa testing agency, ang sample collection authority ukon ang nagkuha sang sample amo ang China Anti-Doping Agency.
Bangud sa amo nga mga kaso, nagdangat na sa 10 ang nagpositibo sa doping test sa 19th Asian Games. #
