Nagsugtanay sanday Japanese superstar Naoya “The Monster” Inoue kag Filipino boxer Marlon “Nightmare” Tapales nga magpatigayon sang blockbuster showdown sa Disyembre 26 agud nga matingob ang apat ka super bantamweight belts.
Ini ang sandig sa pila na ka sources subong nga semana lakip na si Top Rank big boss Bob Arum, manager ni Tapales nga si JC Manangquil kag Sean Gibbons.
Photo: Naoki Fukuda
Ang pound-for-pound king nga si Inoue amo subong ang nagasuksok sang World Boxing Council (WBC) kag World Boxing Organization (WBO) super bantamweight belts, samtang ang Pinoy boxer naman ang World Boxing Association (WBA) kag International Boxing Federation (IBF) super bantamweight champion.
Nahibaluan nga antes nagsaka sang weight si Inoue, isa ini ka undisputed bantamweight world champion.
Nag-debut ini sa super bantam batok sa American boxer nga si Stephen Fulton sang Hulyo 25 kun sa diin iya nakuha ang WBO kag WBC crowns paagi sa technical knockout sa ika-walo nga round.
Kun magdaog siya batok kay Tapales, mangin ikaduha siya nga boksidor nga makatingob sang tanan nga apat ka major belts sa duha ka divisions.
Ini kasunod sa nahimo sang American boxer nga si Terence Crawford nga nakahimo sang amo nga kadalag-an apat ka adlaw matapos nagdaog si Inoue batok kay Fulton.
Indi man ma-asi-asi ang rekord ni Tapales nga former WBO world bantamweight champion nga may 37 wins (19 knockouts) kag tatlo ka kapierdehan.
Undefeated naman si Inoue nga may 25 wins kun sa diin 22 diri ang paagi sa knockout. #
