Nagpahayag ang mga senador nga temprano pa agud maghimo sang konklusyon kaangot sa anunsyo sang International Testing Agency (ITA) nga nagpositibo sa drug test ang naturalized player sang Gilas Pilipinas nga si Justin Brownlee sang naghampang ini sa 19th Asian Games sa China.
Suno kay Senator Francis Tolentino, mas maayo nga hulaton anay kun ano ang resulta sang proseso ilabi na bangud pwede pa man nga mag-apelar sa amo nga kaso.
PHOTO COURTESY OF POC-PSC MEDIA GROUP
Positibo naman si Senator Jinggoy Estrada nga may nagakaigu nga tikang nga himuon agud ma-address ang problema kay Brownlee.
Nagpabutyag naman si Senate Majority Leader Joel Villanueva nga indi siya makapati sa announcement bangud personal gid niya nga kilala si Brownlee. Suno pa sa senador, indi ini una nga bes nga natabo sa maragtas sang sports, apang pananglitan nagsala lang, pat-od nga indi na mapanas ang halit nga natuga sini.
Matandaan nga base sa anunsyo sang testing agency, positibo si Brownlee sa paggamit sang Carboxy-THC, isa ka substance nga nalakip sa mga ginadumilian sang World Anti-Doping Agency.
Na-kolekta ang amo nga sample sang Oktubre 7, isa ka adlaw matapos nagkampyon ang Gilas sang ginlutos sini ang Jordan sa final match.
Magluwas kay Browlee, nag-positibo man sa test ang player sang Jordan nga si Sami Bzai.
Ang sample collection authority ukon ang nagkuha sang sample amo ang China Anti-Doping Agency.
Pareho nga may kinamatarong ang duha ka players nga mag-request para sa analysis sang samples. #
