Posible suno sa Department of Foreign Affairs (DFA) nga may matabo nga rollback sa presyo sang gatong pagkatapos sang byahe ni President Ferdinand “Bongbong” Marcos Jr. sa Saudi Arabia.
Ang kadtuan sang presidente subong nga semana amo ang 2023 ASEAN-Gulf Cooperation Council Summit kun sa diin makaatubang sini ang mga lider halin sa Southeast Asia kag Gulf States.
Photo: Bongbong Marcos/FB
Importante ini suno kay DFA Office of ASEAN Affairs Assistant Secretary Daniel Espiritu bangud ang Gulf Cooperation Council ang ginabug-usan sang highly developed ukon manggaranon nga Arab economies — mga pungsod nga ginakabig nga petrochemical powerhouses magluwas pa nga makabig man nga hub kag logistics economies.
Ang ugat sang mataas nga presyo sang gatong suno sa iya amo ang kakulangan kag ang instability sini sa rehiyon, kag kun maka-kooperar ang duha ka organisasyon kag makapasalig sa isa kag isa sang padayon kag masaligan nga suplay, buot silingon, may lauman nga consistent volume sang supply sa bilog nga tuig.
“If the two original organizations can cooperate on that and assure each other a continued and reliable supply in spite of what we called the vicissitudes of energy economics and the geopolitical instabilities, then we can more or less assure each other of a… or we can rather assure ASEAN of a continued and consistent volume of supply throughout the year,” pahayag ni Espiritu.
Magluwas diri suno sa iya, makabulig man ang amo nga council agud nga ma-address man sang maayo sang Southeast Asia ang problema sa energy kag food security ilabi na ang Qatar nga lakip sa pinakadaku nga producers sang fertilizers.
Oktubre 19 magahalin ang presidente para sa amo nga inaugural summit.
Posible man suno sa ahensya nga may patigayunon nga bilateral meetings sa mga opisyal sang Saudi Arabia kag Bahrain agud maistoryahan ang diplomatic relationships sang amo nga mga pungsod, kag posible man nga magpakigkita si Marcos sa Filipino community sa Riyadh antes ang opisyal nga pagsugod sang summit. #
