Sa ika-anum nga tion subong nga 2023, magahampang ang Filipina tennis star nga si Alex Eala sa main draw sang Women’s Tennis Association (WTA) event.
Ini matapos ginlutos sini ang 2020 French Open girls’ singles champion nga si Elsa Jacquemot sang France, 6-1, 5-7, 6-1, sa final qualifying match sang Jasmin Open sa Magic Hotel Skanes hard court sa Monastir, Tunisia.
Photo: Alex Eala/Facebook
Sa first round sang qualifiers, ginpierde man ni Eala si Feryel Ben Hassen sang Tunisia, 6-1, 6-0.
Sa imbukada sang main draw ukon sa Round of 32 match subong nga Martes, atubangon sang 18-anyos nga Pinay ang second seed nga si Elise Mertens sang Belgium nga anay world No. 1 nga doubles player.
Mabudlay ang kinahanglan agyan ni Eala bangud nagapang-41 si Mertens sa singles rankings apang naga-uyat man sang doubles titles sa Australian Open, Wimbledon, kag US Open.
Magahampang man si Eala sa doubles tournament kaupod sa iya Romanian partner nga si Oana Gavrila batok sa second-seeded pair nga sanday Cristina Bucsaa kag Bibiane Schoofs.
Katapusan nga nasaksihan sang mga Pinoy ang hampang ni Eala sa 19th Asian Games sa Hangzhou, China kun sa diin bronze medalist siya sa women’s singles kag sa mixed doubles kaupod kay Niño Alcantara.#
