ILOILO CITY – Subong nga panahon, madamo nagid sang nagapakuno-kuno.
Amo ina nga indi basta-basta nga magpati lang.
Kag sa mga nagapakunu-kuno naman, untati na ina kay basi magpareho ka sa isa ka lalaki sa Kenya nga gin-aresto bangud nga nagpakunu-kuno nga isa ka abogado.
Ang lalaki amo si Brian Mwenda Njagi nga ginbansagan nga ‘real-life Mike Ross’ nga ginkuha sa popular nga character sa TV series nga ‘Suits’.
Si Brian ang nangin abogado na sa 26 ka nagkalain-lain nga kaso sa Court of Appeal kag High Court nga lunsay niya gindaog apisar sang kakulang sang formal training.
Nakuha niya nga mag-portray nga isa ka kwalipikado nga abogado kag wala sang may isa ka judge nga nakamutik nga indi siya gali abogado.
Nagsugod lamang sa pag-imbestigar ang Law Society of Kenya matapos nakabaton sang reklamo nagikan sa isa ka abogado nga nagahingalan kay Brian Mwenda nga indi sini ma-access ang iya nga account.
Sa ginpatigayon nga imbestigasyon, natukiban nga may yara sang nag-tamper sang iya nga account.
Matapos nakatipon sang bastante nga ebidensya, gin-aresto sang Rapid Action Team sang Law Society of Kenya si Brian Mwenda Njagi bangud sang pagpakunu-kuno nga isa ka abogado.
Wala pa ini nadala sa korte apang ang iya istorya ang gindayaw sang mga tawo nga naglab-ot sa punto nga isa ka Kenyan tycoon ang nagtanyag nga bayaran ang iya pyansa.
