ILOILO CITY – Ginkadismaya sang Iloilo City Police Office ang pagkadakop sang isa ka barangay tanod sa drug buy-bust operation sa Zone 6, Barangay Boulevard, Molo, Iloilo City.
Ang barangay tanod amo si alyas John.
Nadakpan man ang iban pa nga mga durugista nga sanday alyas Nonoy, alyas Odong kag alyas Junjun.
Nakuha sa ila ang 65 grams sang shabu nga may standard drug price nga P442,000.
Sa interview sang Bombo Radyo kay Pol. Lt. Col. Antonio Benitez, Jr., pinuno sang Iloilo City Police Office- Drug Enforcement Team, iya ginpahayag nga ginkatingala niya kun ngaa nga ginkuha pa ini nga tanod sang barangay bangud nga nadakpan man ini sang 2012 sa amo man nga kaso.
Suno kay Benitez, 2016 sang nakagwa sa presuhan si alyas John.
Ang mga subject nga dira mismo sa barangay nagabaligya sang droga, ang ginpaidalom sa halos isa ka bulan nga monitoring.
Sa subong, padayon ang imbestigasyon sang kapulisan sa kun diin ginakuha sang mga ini ang ila nga droga.
