Naghimo sang maragtas ang Filipina racing driver nga si Bianca Bustamante matapos nangin labing una nga female driver nga nakasulod sa McLaren Driver Development program sa Britanya.
Suno sa 18-anyos nga F1 Academy racer nga tumandok sang Laguna, halos indi siya makapati sa anunsyo sang British Team kag isa ka daku nga dungog para sa iya nga itiglawas ang Pilipinas.
Photo: Divulgação/McLaren
Una nga nakilala si Bustamante sa world stage sang motorsports sang nagpasakop siya sa F1 Academy-Prema Racing sang nagligad nga Pebrero; nadag-an niya ang iya una nga titulo sa Spring Race of Circuit Ricardo Tormo sa Valencia, Spain sang nagligad nga Mayo; kag ginsundan sang isa pa ka kadalag-an sa 2023 F1 Academy sa Autodromo Nazionale Monza track sa Italya sang Hulyo.
Antes sina, nag-compete man ini sa W Series kag nabulsa ang top rookie honors sa iya single-seater debut sang 2022.
Suno sa Pinay racer, luyag niya nga mangin consistent kag matatapan ang iya nga mental strength agud makuha ang target nga isa pa ka titulo sa 2024 F1 Academy season kun sa diin maga-karera siya sa idalom sang banner sang ART Grand Prix.
Sa iya pagsulod sa Mclaren, napaidalom na si Bustamante sa guidance sang former McLaren test driver, Formula 1 driver kag Le Mans winner nga si Emanuele Pirro.
Antes ang 2024 season, nakatutok anay ini sa pagtapos sa iya nga F1 Academy season sa Austin sa PREMA Racing. #
