Tuman ka importante ang balay para sa isa ka tawo — amo ina ang iya ginatawag nga puluy-an, palasilungan, dalaganan, kag lugar kun sa diin natukod kag natipon ang tuman ka damo nga mga handurawan (isahanon man siya, ukon kaupod sa iya pamilya).
Kun kaisa, may mga indi mapunggan nga hitabo — kaangay sang mga kalamidad — kun sa diin gulpi madula sa imo ini nga propiedad kag mapilitan ka nga magtukod liwat.
Apang sa natabo sa southwest Atlanta, Georgia, USA, sobra-sobra man ang kaakig nga nabatyagan sang tag-iya nga si Susan Hodgson sang naghalin lang siya sa bakasyon, apang sa iya pagbalik, na-demolish na ang iya balay.
Photo: FOX
Ang malain pa dira, nagsala lang ang kumpaniya sa ila ginguba nga propiedad!
Suno kay Susan, samtang yara siya sa bakasyon, nagtawag ang iya kasilingan kag namangkot kun may gin-hire siya agud nga gub-on ang iya balay. Natingala si Susan bangud ngaa man abi ipaguba niya ang propiedad nga dinekada na nga ginapanag-iyahan sang iya nga pamilya?
Nagpalapit pa ang kasilingan agud nga kumprontahon ang mga naga-demolish sang balay, apang ang ila sabat: “Shut up and mind your own business”.
Nagpalapit man ang himata ni Susan kag nagpangayo sang permit. Sang gin-check na sang isa ka worker ang address, didto nakumpirma nga sala ang ila balay nga ginguba!
“It’s been boarded up about 15 years, and we keep it boarded, covered, grass cut, and the yard is clean,” pahayag ni Susan. “The taxes are paid and everything is up on it.”
Sa subong, wala pa sang sabat ang Atlanta-based nga kumpaniya nga You Call It We Haul It.
Gin-ako naman sang tag-iya nga tuman ang iya kaakig, kag nagapanumdom siya kun joke time lamang ini. Samtang wala pa na-resolbar ang isyu, nag-file si Susan sang report sa pulis kag nag-kontak na sa iya nga mga abogado.#
