ILOILO CITY- Wala pa sang banwa sa probinsya sang Iloilo ang naka-umpisa sang sentineling program kasunod sang African Swine Fever nga na-eksperyensyahan.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga may yara sang gin-set nga timeline ang probinsya sa Oktubre 31 kun sa diin tanan nga banwa nga luyag nga magpatigayon sang programa ang nagakadapat nga magpasa sang mga requirements.
Pagkatapos nga makapasa suno kay Dr. Tabuada, i-endorso ini gilayon sa Department of Agriculture agud nga ma-check ang dokumento kun kwalipikado ang isa ka lugar.
Agud nga ma-qualify para sa sentineling, kinahanglan nga wala na sang outbreak ang isa ka banwa sa sulod sang 40 ka adlaw, wala sang may nabilin nga baboy sa barangay, apang kun may yara man, dapat nga ilakip ini sa programa kag i-subject sa surveillance, kinahanglan nga in place man ang biosecurity measure, nagapatigayon sang disinfection sa pagpanguna sang Municipal Agriculture Office kag dapat may yara sila sang African Swine Fever ordinance.
Dugang pa sang natungdan, kada qualified farmer ang makabaton sang tatlo ka mga baboy apang isa anay ang una nga ihatag kag kun maka-survive, dugangan ini sang duha apang kun magpositibo sa African Swine Fever, i-subject ini sa depopulation.
