ILOILO CITY – Wala sang may nakit-an nga problema ang Department of Trade and Industry- Iloilo sa suplay sang basic goods para sa pista minatay.
Kahapon, nagpatigayon sang inspection ang ahensya sa nagkalain-lain nga merkado kag baligyaan sa syudad nga nagalakip sa mga retail markets, flower shops, kag transport terminals.
Sa interview sang Bombo Radyo kay Ma. Dinda Tamayo, director sang Department of Trade and Industry- Iloilo, iya ginpahayag nga bastante ang suplay sang mga basic goods kag estable man ang presyo.
Suno kay Tamayo, ang aktibidad ang purely monitoring lamang.
Pahayag niya, ini ang dululungan nga ginpatigayon sa bilog nga rehiyon bilang kabahin sang tikang sang ahensya nga hatagan sang proteksyon ang kinamatarong sang mga kunsumidor kag masiguro nga ang mga produkto ang nagapabilin nga accessible sa Western Visayas.
Gin-enganyo man sang ahensya ang publiko nga i-report sa pinakamalapit nga opisina sang Department of Trade and Industry sa tion nga may mahibaluan nga nagalapas sa consumer welfare.
Mahimo man nga mag-contact sa ila hotline nga DTI-1384.
