ILOILO CITY – Suspendido ang proclamation sang apat ka mga nagdaog nga kandidato sa Barangay and Sangguniang Kabataan Elections sa Western Visayas.
Ini bangud nga may yara pa sila sang pending nga disqualification cases.
Sa interview sang Bombo Radyo kay Atty. Dennis Ausan, director sang Commission on Elections Region VI, iya ginpahayag nga ang isa ang nagikan sa Dumarao, Capiz; ang duha ang nagikan sa probinsya sang Iloilo, partikular sa banwa sang Tigbauan kag San Dionisio; kag ang isa naman ang nagikan sa E.B. Magalona sa Negros Occidental.
Nagpamaliabad si Ausan nga hingadlan ang duha ka mga barangay sa probinsya sang Iloilo apang base sa nauna nga report nga ginpagwa sang Comelec-Central Office, may yara sang suspension of proclamation sa Barangay Manduawak, San Dionisio kag sa Binaliuan, Tigbauan.
Suno kay Ausan, may yara sang pagsulundan sa local government code nga sundon sa mabankante nga posisyon bangud sa suspension for proclamation.
Sa bilog nga pungsod, may yara sang kabilugan nga 256 proclamations nga suspendido bangud sang pending nga disqualification cases.
