ILOILO CITY – Sabton sang Iloilo City Government ang gasto sa paghaya kag cremation sang pulis nga napatay sa drug buy-bust operation sa Barangay Concepcion, Iloilo City Proper.
Ang napatay nga myembro sang Special Weapons and Tactics amo si Police Staff Sergeant Michael Malan nga natiruhan sang subject nga si Glen “Bongbong” Yturriaga.
Sa interview sang Bombo Radyo kay Iloilo City Mayor Jerry Treñas, iya ginpahayag nga magluwas sa syudad, magabulig man siya personal kag amo man ang USWAG Ilonggo Party-list.
Suno kay Treñas, magluwas sa gasto sa funeral services, pangitaan man niya sang paagi agud nga mabuligan pa-eskwela ang nabilin nga anak ni Malan.
Sa bahin naman sang kapulisan, ginpahayag ni Treñas nga pangitaan niya sang paagi agud nga madugangan ang equipment kag training sang mga personnel.
Pahayag niya, suportado niya ang tanan nga operasyon sang kapulisan apang dapat man nga siguraduhon ang segurididad sang mga pulis.
Mapakig-angut man siya sa legal team sang Iloilo City Police Office agud nga mapabaskug ang kaso batuk kay Yturriaga.
