Gin-athag sang City Intelligence Unit (CIU) sang Iloilo City Police Office (ICPO) nga ang papel sang mga nagkaladakpan nga Chinese nationals sa ginaalegar nga cybersex den sa Barangay Balantang, Jaro, Iloilo City amo ang pag-facilitate nga makakita sang mga kustomer kag pag-manipula sa mga video nga ila ipaguwa.
Sa interview sang Bombo Radyo kay Pol. Lt. Col. Antonio Benitez, head sang CIU, iya ginpahayag nga base sa ila natipon nga impormasyon, wala man sang videos kun sa diin nagapakighilawas gid ang mga models.
Ang makit-an lamang suno sa natungdan amo ang mga erotic moves kag mga nagahublas nga models nga ginalakipan sang mga Filipina kag foreigners.
Suno pa kay Benitez, nakabaton man sila sang intelligence reports nga sa amo mismo nga balay sa Balantang, Jaro nagasaot kag nagahublas ang iban nga models kag ginakuhaan sang videos kag pictures, apang wala lamang naaktuhan sang mga pulis sang ginpatigayon ang raid.
Ginpahayag nga masobra anum ka bulan na nga naga-operate ang amo nga Chinese nationals sa amo nga balay apang masobra pa lamang isa ka bulan nga ginapanilagan sang otoridad antes nagkaladakpan.
