Nagapanugyan ang Regional Anti-Cybercrime Unit (RACU) 6 sa publiko nga mag-doble halong kag indi magdali-dali sa pagpati sa ka-transaksyon agud malikawan nga madugangan ang cybercrime cases sa Western Visayas.
Sa interview sang Bombo Radyo kay Police Captain Rexy Calubing, chief sang Administrative Section sang RACU 6, iya ginpahayag nga kalabanan sa mga cybercrime incidents sa rehiyon ang naangot sa estafa, swindling, kag online scam nga paglapas sa Article 315 sang Revised Penal Code.
Photo: CNBC
Suno kay Calubing, pagkatapos sang pandemya, amat-amat nga nagadamo ang na-report nga kaso sang cybercrime sa rehiyon kag padayon ini sa pagsaka tubtub subong.
Agud mahimo nga non-bailable nga kaso ang estafa suno sa pulis, kinahanglan nga mahulog ini sa large-scale estafa gani kinahanglan nga madamo ang complainants.
Bilang panugyan naman sa publiko, ginpahayag sang natungdan nga dapat nga mangin mahinalungon gid sa impormasyon kun involved na ang kuwarta kag sensitibo nga mga impormasyon.
Kun makit-an nga makaduluda kag “too good to be true” ang offer suno sa natungdan, mas maayo nga indi na lang pagdayunon ang transaksyon.
