Nagalaum ang Department of Agriculture (DA) nga makakuha sang bastante nga suporta halin sa Kongreso may kaangtanan sa ginaduso sini nga pag-require sa mga restaurants nga magtanyag sang opsyon nga half-cup rice serving agud nga malikawan nga mag-usik sang pagkaon.
Suno kay DA-Philippine Rice Research Institute (PhilRice) Development Communication Division Head Hazel Antonio, iduso nila ini sa idalom sang liderato ni President Ferdinand Marcos Jr. bangud kun matandaan, sang ini senador pa lamang, nag-file man ini sang kaangay nga hagna.
Suno kay Antonio, nagpalapit na sila sa opisina ni Sen. Loren Legarda agud ma-sponsor sini ang measure.
Base sa ila inisyal nga konsultasyon sa mga negosyante suno sa natungdan, gina-abi-abi man ang amo nga proposal sa kondisyon nga wala lang ini sang ihatag nga dugang nga galastuhan.
Pahayag pa ni Antonio, may 46 na ka mga ordinansa nga napaguwa nga may half-cup sa rice option kag lakip dira ang dalagku nga mga syudad kaangay sang Quezon City, Manila, Davao, Cebu, Puerto Princesa, Baguio, kag Iloilo.
Gina-istoryahan ini nga isyu kag ang food waste kadungan sang National Rice Awareness Month subong nga Nobyembre. #
