Pabor ang pila ka tricycle drivers sa ginaduso nga dress code para sa ila sa idalom sang ginaduso nga ginaproponer nga Tricycle Route Plan (TRP) sa syudad sang Iloilo.
Sa proposed guidelines nga ginplastar sang Technical Working Group, nabutang nga antes mahatagan sang Iloilo City Government sang prangkisa ang tricycle operators, nagakadapat nga may inspection sa salakyan, may dress code ang mga tricycle drivers kag may driver’s orientation.
Una man nga ginpahayag sang Public Safety and Transportation Management Office (PSTMO) nga lakip sa dress code requirement ang pagsuksok sang tricycle driver sang sapatos kun magbiyahe kag dumilian man ang pagsuksok sang sando kag shorts.
Matandaan nga naistoryahan ini nga mga requirement kadungan sang committee hearing sang Committee on Transportation sang nagligad nga adlaw.
Sa interview sang Bombo Radyo sa driver nga si Kenneth Doromal, iya ginpahayag nga dugang pa ini nga “pogi points” sa driver kun pormal.
Pabor si Dormal nga indi na magsuksok sang tsinelas para sa pormalidad kag agud nga manamian man ang pasahero.
Wala man sang nakit-an nga problema si Aljim Divino sa gin-proponer nga dress code.
Suno kay Divino nga nagabyahe sa Arroyo, City Proper, bag-o palang sini nabatian ang ginaduso nga pagsulundan apang “okay” lang sa iya nga magsuksok sini agud nga maka-engganyo man sang dugang nga pasahero. #
