ILOILO CITY- Magasugod na subong nga adlaw ang closed season sa pagpangisda sang tabagak, balantiyong kag guma-a sa Visayan Sea.
Ini ang magalawig tubtub sa Pebrero 15,2024.
Sa interview sang Bombo Radyo kay Bureau of Fisheries and Aquatic Resources Region VI Director Remia Aparri, iya ginpahayag nga sa sulod sang tatlo ka bulan, ang mga commercial kag municipal fisherfolk ang ginamanduan nga maglikaw sa pagpangisda kag pagbaligya sang nasambit nga mga isda sa mga boundaries.
Sa ini nga tyempo suno sa natungdan, ginahatagan sang tion ang mga isda nga mag-reproduce.
Magahatag man sang tion ang closed season agud makapahuway ang dagat kag makapadamo sang iya mga resources.
Ang closed season ang ginpatuman pinaagi sa Fisheries Administrative Order 167 series of 1989 kag gin-ammend sang Fisheries Administrative Order 167-3 series of 2013.
Sakop sang closed season ang Danao River sa Escalante City, Negros Occidental padulong sa Sta. Fe, Cebu.
Ini ang magapadayon naman sa Madridejos, Cebu padulong sa Gigantes Island sa Carles, Iloilo sa diin magaserbe nga marker ng lighthouse.
Lakip man diri ang Olotayan Island sa Roxas City.
Sa tunga naman sang Iloilo kag Negros Occidental, ang boundary ang maga-umpisa sa Talisay River sa Barotac Nuevo, Iloilo padulong sa Tomonton Point sa EB Magalona sa Negros Occidental balik sa Danao River sa Cebu Province.
