ILOILO CITY – Natigayon nga masabat sang Land Transportation Franchising and Regulatory Board ang panawagan sang mga transport groups nga nangin rason sang ginpatigayon nga tatlo ka adlaw nga untat-byahe nga ginpamunuan sang Pinagkaisang Samahan ng mga Tsuper at Operators Nationwide (PISTON).
Lakip sa mga ginareklamo sang mga transport groups amo ang Public Utility Vehicle Modernization Program kag ang compulsory nga consolidation sang mga traditional jeepneys.
Sa interview sang Bombo Radyo kay Elmer Forro, secretary general sang Bayan-Panay iya ginpahayag nga sa pila ka bahin sang pungsod kun sa diin may nag-upod sa transport strike, personal nga nagpadulong si Land Transportation Franchising and Regulatory Board chairman Teofilo Guadiz agud nga mahibaluan ang ila mga demands.
Suno kay Forro, lakip sa mga demands amo ang mga masunod:
-kilalahon kag resputuhon ang mga nag-upod sa strike kag indi pagbalusan;
-sabat sa deadline sang compulsory consolidation kag pag-review sang omnibus franchising guidelines kun sa diin, mangin kabahin diri ang transport sector;
-pagkuha sang penalidad sa late registration; kag
-paghatag sang lima ka tuig nga franchise sa mga operators kag drivers.
Ginahingyo man sang operators sa ahensya nga tumanon ang promisa ilabi na ang pag-review sang omnibus franchising guidelines kag pagkonsiderar sang deadline sang compulsory consolidation sang mga jeep.
Sa tion nga indi nila ini matuman, ginpahayag ni Forro nga nakahanda ang transport sector kag ang pumuluyo nga magpakigbato.
Nahibaluan nga pagkatapos sang transport strike nga ginpamunuan sang PISTON, nagsugod man ang untat byahe nga ginlunsyar sang Manibela.
