Gin-aprubahan na sang International Olympic Committee (IOC) ang aplikasyon sang Olympic swimming medalist nga si Kayla Sanchez nga matiglawas ang Pilipinas sa 2024 Paris Olympics sa France.
Ginhatag ini nga exemption apisar nga wala pa nakumpleto sang 22-anyos nga Filipino-Canadian swimmer ang tatlo ka tuig nga rekisito agud nga mahitso ang iya pagsaylo halin sa Canada pakadto sa federation sang Pilipinas.
Photo Courtesy: Giorgio Scala/Deepbluemedia/Insidefoto via Swimming World
Nahibaluan nga Canada ang ginatiglawas ni Sanchez sa nagliligad nga mga tinuig, lakip na sa 2020 Tokyo Olympics sa Japan kun sa diin nakuha niya ang silver medal bilang kabahin sang 4×100-meter freestyle relay kag ang bronze medal sa 4x100m medley relay.
Hulyo 2022 naman sang nagsaylo ini sang nationality kag una sini nga gin-representar ang Pilipinas sa 19th Asian Games sa Hangzhou, China subong nga tuig.
Apisar naaprubahan na ang request sini nga maka-compete dala ang hayahay sang Pilipinas, kinahanglan gihapon sini nga maka-qualify sa Olympiada ukon mahimo man nga ma-nominate sang national swimming federation paagi sa Universality Rule.
Nahibaluan nga halin sang nagpasakop ang Pilipinas sa Olympiada, isa pa gid lamang ka Filipino swimmer ang nakadaog: si Teofilo Yldefonso nga bronze medalist sa men’s 200m breaststroke sa 1928 Amsterdam kag 1932 Los Angeles editions.
