ILOILO CITY – Magapatawag sang pagsinapol si Concepcion, Iloilo Mayor Milliard Villanueva kaupod ang TVI Resource Development Philippines Inc. (TVIRD), affiliate sang TVI Pacific Inc. nga isa ka Canadian mining company, upod ang Provincial Government Environment and Natural Resources, Department of Environment and Natural Resources, mga barangay officials sang Macatunao, Taloto-an kag Tambaliza sa Pan de Azucar Island.
Sa interview sang Bombo Radyo kay Mayor Villanueva, iya ginpahayag nga pinaagi sa pagsinapol, mapamatian ang mga issues kag concern sang kadam-an kag makahatag man sang sabat ang mining company sa exploration activity nga himuon.
Suno sa alkalde, ang exploration permit nga ginhatag sa mining company ang naghalin mismo sa Mines and Geosciences Bureau sang Department of Environment and Natural Resources Office kag wala diri sang kahilabtanan ang lokal nga panggobyerno.
Ang exploration activity ang ginakabig nga initial mode sang pag-acquire sang mining rights sa diin ginahatagan ang holder sang kinamatarong nga magpatigayon sang exploration sa tanan nga minerals sa specific area.
Ang permit nga ini ang valid sa sulod sang duha ka tuig halin sa petsa kun san-o ini nga gin-issue kag mahimo nga ma-renew tubtob sa maximum sang apat ka tuig para sa nonmetallic mineral exploration ukon anum ka tuig para sa metallic mineral exploration.
Sa pag-file sang Exploration Permit sa Mines and Geosciences Bureau, ang kompaniya ang gina-require nga magpasa sang location map ukon sketch plan sa permit area, exploration work program, environmental work program, proof of technical competence and financial capability, kag certificate of environmental management and community relations record.
Pahayag sang alkalde, ang mining company ang magapangita sang valuable mineral, hibaluon kun bala may commercial value ang mineral deposits kag amo ang pag-apply sang mining permit.
Dugang pa niya, sa himuon nga exploration activity, yara mismo ang Municipal Environment and Natural Resources Office nga magabantay kag magasiguro nga wala sang destruction ukon pagbungkag sang duta kag wala sang pag-utod sang puno.
Sa pihak sang exploration, gin-require sang alkalde ang mining company nga magpatigayon sang information education campaign kag ini ang natigayon na sa Barangays Macatunao, Talotoan kag Tambaliza.
