ILOILO CITY – Nagdangop na sa Bureau of Internal Revenue ang grupo sang mga riders agud nga ireklamo ang Creative Smart Ideas Events and Mktg Co. nga gina-alegar nang-scam sa ginpatigayon nga Juan Ride 2023.
Sa interview sang Bombo Radyo kay Marvin Unabia, iya ginpahayag nga nabaton na sang opisina sang regional director sang Bureau of Internal Revenue ang ila nga sulat.
Suno kay Unabia, ang kaundan sang ila reklamo amo ang ginapahayag ghost winners sa ginpatigayon nga draw.
Pahayag niya, magadangop man sila sa National Bureau of Investigation agud nga mag-file sang criminal complaint.
Upod niya nga magapadulong sa amo nga ahensya ang ginabanta 30 tubtob 40 ka iban pa nga mga riders.
Una na nga ginpanginwala sang organizer ang alegasyon sang mga grupo sang mga motorcycle riders nga isa ka scam ang nasambit nga event kag ghost winners ang mga nagdalaug sang premyo nga mga motorsiklo sa ginpatigayon nga raffle draw.
Suno kay Eduardo Retazo, Business Development Director sang amo nga organizer., wala sang basehan kag irrelevant ang amo nga akusasyon bangud nagsunod sila sa legal nga proseso kag may yara sang ginakinahanglan nga requirements para nga magpatigayon sang amo nga aktibidad.
