Malapit na lang masaksihan sang football fans sa bilog nga kalibutan ang liwat nga pag-atubangay sa pitch sang duha ka all-time greats nga sanday Lionel Messi sang Argentina kag Christiano Ronaldo sang Portugal!
Matabo ini sa pre-season friendly game sang club ni Messi nga Inter Miami batok sa Al-Nassr nga club ni Ronaldo sa Saudi Arabia sa Pebrero 1, 2024.
Kabahin ini sang Riyadh Season Cup kun sa diin magluwas sa Al-Nassr, makasambuwa man sang Miami ang Al-Hilal sa Enero 29.
Kilala ang duha bilang pinakadaku nga magkasumpong sa football sa sulod sang masobra isa na ka dekada — una nga nagsambuwa sang 2008 sang ginlutos sang Manchester United ang Barcelona sa Champions League semi-finals kag nasundan pa sang 34 ka mga okasyon kun sa diin 16 ka beses nga nagdaog ang Argentine star, 10 ka beses ang Portuguese star, kag siyam ang nagtapos sa draw.
Sa sini nga 35 ka pag-atubangay sang duha, 21 ka goals kag 12 ka assists ang nahimo ni Messi samtang may 20 goals kag isa ka assist naman si Ronaldo.
Sa prestihiyoso nga Ballon d’Or awards, walo ang gina-uyatan sang 36-anyos nga si Messi samtang may lima naman ang iya 38-anyos nga Portuguese opponent.
Matapos nakadaog sa World Cup sa Qatar sang 2022, naghalin si Messi sa French club nga Paris Saint-Germain (PSG), nagsaylo sa Inter-Miami — indi daku nga team sa Estados Unidos sang Amerika — apang natigayon nga nakadaog sa Leagues Cup nga amo ang labing-una nga tropeo sang club.
Si Ronaldo naman ang nagpirma sa Al-Nassr sang Saudi Pro League matapos nga nagbiya ini sa Manchester United.
Matandaan nga sini nga 2023, nakaatubangay man sanday Messi kag Ronaldo sa friendly match sa Saudi Pro League XI.
(Photo is from Getty Goal)
