Wala gani na-orasan kag nahubas na ang tickets para sa mga luyag maglantaw sang hampang sang 36-anyos nga Argentine football superstar nga si Lionel Messi sa Hong Kong.
Atubangon ni Messi kag sang iya American club nga Inter Miami ang team sang Hong Kong sa Hong Kong Stadium sa Pebrero 4 kun sa diin lab-ot lamang sa 40,000 ang mahimo ma-akomodar nga tumalan-aw.
Suno sa organizers, halos duha ka milyon ang naghingagaw sa ticketing app agud makakuha sang pass sa balor nga $110-$625 ukon P6,100-P34,800.
Dismayado naman ang iban nga football fans bangud sang error message sa application nga nagsiling “traffic overload.”
Katapusan nga naghampang ang nasambit nga World Cup champion kag eight-time Ballon D’or Winner sa Hong Kong sang 2014 nga isa man ka friendly game.
Ang atubangon nanday Messi kag Inter Miami nga club ang ginabug-usan sang players halin sa top division sang Hong Kong.
Magluwas sa Argentine great, featured man sa amo nga football match ang iya Miami kag former Barcelona teammates nga sanday Sergio Busquets kag Jordi Alba. Madamo man ang reports nga nagasiling nga Miami player na ang Uruguayan ex-Barcelona striker nga si Luis Suarez sa tion nga mag-abot ang MLS club sa Hong Kong.# (Photo: Stacy Revere/Getty Images)
