Maga-umpisa na subong nga adlaw, Disyembre 18, ang mga kumpetisyon para sa Philippine National Games (PNG) kag Batang Pinoy (BP) National Championships!
18,000 ka mga atleta nagikan sa 193 ka local government units (LGUs) ang magapasakop sa nagkalain-lain nga sports events.
Lakip diri nga aktibidad amo ang athletics, swimming, archery, badminton, 3×3 basketball, boxing, chess, cycling, dancesport, football, gymnastics, judo, karate, kickboxing, lawn tennis, muay thai, pencak silat, sepak takraw, table tennis, taekwondo, beach volleyball, wrestling, weightlifting kag wushu.
Ang PNG ang para sa mga atleta nga naga-edad 18-anyos pasaka samtang ang BP naman ang para sa naga-edad 17-anyos panubo.
Kahapon, Disyembre 17, sang ginhiwat ang opening ceremony sa Ninoy Aquino Stadium sa Manila sa pagpanguna ni Philippine Sports Commission (PSC) chairman Richard Bachmann.
Lakip sa nagtambong sa seremonya amo ang mga notable alumni sang BP kag PNG nga sanday 2020 Tokyo Olympics gold medalist Hidilyn Diaz kag Olympic bronze medalist Eumir Felix Marcial.
Yara man ang iconic sports figures sa pungsod nga amo sanday two-time world champion Carlos Yulo, manghod sini nga si Karl Eldrew nga nakabulsa sang 12 gold kag duha ka silver medals sa BP kag PNG, tennis star nga si Alex Eala, 2023 Asian Para Games gold medalist Jerrold Mangliwan, kag iban pa.#
