Indi matapos-tapos ang pasalamat sang isa ka 22-anyos nga iloy sang nakit-an nga buhi pa ang iya apat ka bulan nga lapsag apisar nga ginlupad na ini sang buhawi kag narumpag na ang ila nga balay.
Natabo ini sa Tennessee sa USA kun sa diin anum ka mga tawo ang napatay kag linibo ang nawad-an sang suplay sang kuryente sang naglaslas ang buhawi sang nagligad lamang nga semana.
Suno kay Sydney Moore, yara siya sa sulod sang balay kaupod sa iya nga boyfriend nga si Aramis Youngblood kag kabataan sang nabatyagan nga nag-agi ang buhawi.
Dali-dali nga ginluksuhan ni Sydney ang iya isa ka tuig nga subang nga bata kag sang hinali lang, nag-collapse ang dingding sang ila balay.
“As soon as I jumped on top of Princeton, the back bedroom, the walls collapsed,” suno kay Moore. “I remember me and Princeton got thrown onto the ground and then we got picked up and thrown down again, but he never left my arms. And somehow, someway, I still had his pacifier clenched in my hands.”
Nakit-an man mismo sang iya boyfriend kun paano ginhakop sang buhawi ang balay kag ginhakwat sang hangin ang ginatulugan sang bata.
Ginhingagaw pa sang lalaki nga malagas ang suludldan, apang mangin siya ang wala nakasarang sa hangin kag nalupad paguwa sa balay.
“I remember the first question I asked [Youngblood] was, ‘Where’s my baby?'” pahayag ni Moore. “And he said he didn’t know.”
Sang nagtawhay na ang sitwasyon, ginpangita ni Sydney kag sang iya boyfriend ang bata kag wala sang sudlan ang kakulba kun ano na ang itsura sini.
Halos 10 minutos ang ginlawig sang ila pagpangita kag indi makapati ang iloy sang nakit-an sini nga nagabugtaw na ang iya baby samtang yara ini malapit sa natumba nga kahoy. Suno sa iya, wala lang niya ginahambal apang naghuna-huna na siya nga patay na ang bata, gani naghilibion ini sang ginhakos ang lapsag nga iya gintawag nga “grace of God.”
“It was just like he was placed in a tree, like a little tree cradle for a baby. It was like a cubby hole in a tree, at the bottom.”
Wala man sang naluwas sa ila nga propiedad bangud sa buhawi apang tuman man ang pasalamat ni Sydney sa iya mga kasilingan bangud sang paghatag sang mga gatas, diapers, kag mga bayo para sa iya mga anak.
Temporaryo nga nagatinir si Moore kag ang iya boyfriend sa hotel room, samtang gintugyan naman ang duha ka mga bata sa pakaisa ni Moore nga amo ang mas may kaayo nga kahimtangan pagkatapos sang natabo nga buhawi. # (Photo: Sydney Moore via ABC News)
