ILOILO CITY- Positibo ang delegasyon sang Iloilo Province sa Batang Pinoy 2023 nga makadala pauli sang madamo nga medalya.
Ini matapos nga nakuha sang Iloilo Province ang una nga gold medal sa Athletics pinaagi kay Kent Paul Burdan sa 200M U18 category.
Gold medalist man si Airex Gabriel Villanueva U20 sa discus throw paagi sa distance nga 44.69 meters nga mas mataas sa iya personal best kag 2023 Palarong Pambansa Record nga 42.86 meters.
Sa interview sang Bombo Radyo kay Mr. Ray Cabarles,Sports Development Officer IV sang Iloilo Sports Development and Management Office, iya ginpahayag nga may yara tanan ka 39 athletes nga gin- sponsoran sang Iloilo Province.
Magahampang ang mga ini sa athletics,badminton,chess, table tennis, tennis, arnis, karatedo, kag cycling.
Ginpahayag naman ni Cabarles nga sa bahin sang delegasyon sang Iloilo Province, nangin maayo ang akomodasyon sa ila.
Matandaan nga may pila ka delegasyon sa Batang Pinoy nga nadismaya sa Philippine Sports Commission bangud sa pagpabaya sang mga atleta kag delegado nga nagapasakop sa Batang Pinoy 2023 kag isa na diri ang ang mga atleta sang Iloilo City.
