Nagahingyo ang lehitimo nga fireworks industry stakeholders sa gobyerno nga indi pag-ipatuman ang ginaduso nga nationwide ban sa firecrackers.
Ini kasunod sang proposal ni Interior and Local Government Secretary Benhur Abalos sa local government units (LGUs) nga magpasar sang mga ordinansa nga nagadumili sa paggamit kag display sang fireworks sa ila tagsa ka lokalidad.
Suno naman kay Philippine Fireworks Association president Jovenson Ong, kun may ipatuman nga ban, magasirado man ang tanan nga legal manufacturers apisar nga ang matuod nga balasulon sa mga aksidente amo ang mga iligal nga manufacturers.
Bisan may ban nga iimplementar suno sa iya, maga-operate gihapon ang iligal nga fireworks stakeholders kag sa pagkamatuod, may tyansa pa nga mas magadaku ang ila income bangud maga-sira na kag magatuman sa ban ang legal nga mga manufacturers.
Nagpangabay ini nga indi pagpatandugon sang regulated chemicals nga ginagamit sa paghimo sang pyrotechnics ang tanan nga illegal manufacturers nga wala sang lisensya ukon Philippine Standard (PS) marks sa ila produkto.
Ang PS MARKs nagapatuhoy sa Philippine Standard Quality and/or Safety Mark kag Import Commodity Clearance sticker.
Ginpahayag man sini nga ang smuggled fireworks halin sa China kag online sale sang illegal fireworks kag regulated chemicals amo ang naga-compete sa legally manufactured nga fireworks halin pa sang nagliligad nga tinuig.
