Wala na sang iban pa nga ginalantaw subong nga makalapaw sa rekord sang two-time world champion kag decorated gymnast sang Pilipinas nga si Carlos Yulo kundi ang iya manghod nga si Karl Eldrew nga agaw-atensyon sa nagapadayon nga Batang Pinoy Games sang Philippine Sports Commission (PSC).
Naubos-bulsa sang 15-anyos nga gymnast ang pito ka individual gold medals sa men’s artistic gymnastics sa Gymnastics Association of the Philippines sa Intramuros, Manila.
Ini amo ang mga kategorya sa vault, still rings, floor exercise, high bar, parallel bars, pommel horse kag individual all-around.
Suno mismo sa Lolo sang mag-utod nga Yulo nga si Rodrigo Frisco, nagapati siya nga malapawan pa ni Karl Eldrew ang magulang sini nga una na nga nakilala sa pagdaog sa floor exercise sa 2019 world championships sa Stuttgart, Germany kag vault sa 2021 worlds sa Japan.
Sa subong, ginahulat pa ni Karl ang team event results bangud kabahin pa gid ini sang Manila squad nga kun matabo amo na ang iya nga ikawalo nga gold medal.
Antes ang Batang Pinoy, may pangalan na si Karl sa gymnastics bangud sa apat sini ka gold medals, isa ka silver, kag isa ka bronze halin sa 2023 JRC Stars Artistic Gymnastics Championships sa Bangkok, Thailand.
Nakadaog man siya sang silver sa men’s junior vault sa Asian Artistic Gymnastics Championship sa Singapore sang nagligad nga Septyembre kun sa diin nakadaog naman ang iya magulang nga si Carlos sang tatlo ka golds, isa ka silver, kag isa ka bronze.#
