Gin-ako sang Japanese boxing superstar nga si Naoya Inoue nga may ginakakulbaan man ini sa ila nagahilapit nga sambuwa sang Pinoy champion nga si Marlon Tapales.
Si Inoue ang heavy favorite nga magdaog sa amo nga super bantamweight unification bout apang suno sa iya, ang iya ginakabalak-an amo ang pagkumpyansa ilabi na bangud madamo nga tawo ang nagapati nga mangin mahapos lang para sa iya ang away.
Nagapati ang team sang “The Monster” nga delikado nga kontra si Tapales gani nagdala sila sang sparring partners halin sa iban nga mga pungsod agud nga mahandaan niya ang nagkalain-lain nga istilo sa away.
“For this fight I am dealing with a different training regiment, making adjustments, and building up an image in my mind of myself as a boxer who is dexterous and can do anything,” suno sa Japanese boxer.
Ginpahayag man sini nga magahalong siya bangud posible nga makahimo matuod sang upset ang Pinoy boxer.
“I improved a lot, and worked on counters against Tapales. We had very good training sessions and we have made it to this point,” dugang pa sini.
Undefeated si Inoue (25-0 nga may 22 knockouts), current pound-for-pound king, kag amo ang naga-uyat sang World Boxing Organization (WBO) kag World Boxing Council (WBC) titles.
Si Tapales naman ukon kilala nga “Nightmare” (37-3 nga may 19 knockouts) amo ang nagauyat sang korona sa World Boxing Association (WBA) kag International Boxing Federation (IBF).
Balantayan ang sambuwa sa Martes sang gab-i, Disyembre 26, sa Ariake Arena sa Tokyo, Japan.
Magahampang man sa undercard sang unification showdown ang Cebuano boxer nga si John Paul Gabunilas nga maga-atubang kay Kanamu Sakama sang Japan sa eight-rounder non-title bout.#
