Nalapawan na sang Iloilo City Local Economic Enterprise Office (LEEO) ang P76-million nga target sini nga total collection para sa bilog nga tuig 2023.
Sa interview sang Bombo Radyo kay Maricel Mabaquiao, pinuno sang opisina, iya ginpahayag nga sa Enero tubtub sa Nobyembre subong nga tuig, yara na sa P79.1-million ang ila nga koleksyon.
Ang ginkuhaan sini amo ang rentals, pagsulod sang goods, kag iban pa nga mga fees sa Central kag Terminal markets sa City Proper, Jaro Big kag Small markets, mga merkado sa Arevalo, La Paz, kag Mandurriao, kag slaughterhouse sa Brgy. Tacas, Jaro.
Magluwas pa ini sa average nga P400,000 nga nakuha gikan sa parking fees sa pili nga mga dalanon sa syudad.
Ginpasalamatan sang natungdan ang mga market in-charge kag ang mga personnel nga daku ang dedikasyon sa trabaho.
Maid-id man ang monitoring kag evaluation suno kay Mabacquaio rason nga nalab-ot ang target.
Nahibaluan nga nagapadayon subong ang rehabilitasyon agud nga mapaayo pa ang imprastraktura kag pasilidad sa mga merkado agud nga maserbehan pa sang maayo ang publiko kag mangin ang mga vendors.
Samtang nga wala pa natapos ang rehabilitasyon, may yara sang temporary stalls nga ginpahamtang agud nga sige-sige ang baligyaanay kag indi madulaan sang palangabuhian ang mga manugbaligya.#
