Napatay na sa edad nga 90-anyos ang award-winning Mexican actress nga si Ana Ofelia Murguía nga amo ang tingog sa likod ni “Mama Coco” sang 2017 Disney Pixar animated movie nga “Coco.”
Wala ginsapubliko sang otoridad ang rason sang iya kamatayon.
“With deep sadness, we regret the sensitive death of the leading actress Ana Ofelia Murguía, who was part of the stable cast of the National Theater Company of Mexico, and whose artistic career was vital for the performing arts of Mexico,” kabahin sang anunsyo sang National Institute of Fine Arts and Literature.
Beterana si Murguía sa pag-arte bangud sang dinekada nga karera sini sa pelikula, teatro, kag telebisyon.
Kilala siya nga nakabaton sang lifetime achievement Golden Ariel award sang 2011 bangud sang iya 40 ka tuig nga appearance sa entablado kag sa screen.
Sa amo man nga prestihiyoso nga Mexican film industry award, anum ka beses siya nga na-nominate bilang best supporting actress kag nagdaog sang 1979, 1986 kag 1996.
Ang kamatayon ni Murguía ang kasunod man sang pagtaliwan sang 109-anyos nga si Maria Salud Ramirez Caballero, ang Mexican woman nga amo ang inspirasyon kun ngaa nahimo ang karakter ni Mama Coco sa pelikula.
Magluwas sa Coco film, popular man si Murguía sa mga pelikula nga “The Queen of the Night” sang 1994 kag “Nobody Will Speak of Us When We’re Dead” sang 1995.# (Photo: LaPrensa)
