Duha ka pasabog ang dungan nga ginbuy-an sang yoga teacher kag model nga si Alexis Suapengco — una, siya ang iloy sang anak ni Diego Loyzaga nga si Hailey, kag ikaduha, ginpalayas siya kag ang iya bata bangud sa lain nga babayi sang 28-anyos nga aktor.
Ini nga alegasyon ang ginbuyagyag sa Instagram story ni Suapengco kun sa diin naka-tag pa mismo si Loyzaga.
Pahayag sini: “So my baby daddy @diegoloyzaga decided to kick me out and his baby out of his house so this girl can come over.”
May gin-share man ini nga Instagram profile sang babayi nga nakapangalan kay “Cecile Mendoza.”
Sunod diri amo ang isa ka separado nga post kun sa diin gin-alegar sang model nga ginhingyo sa iya sang aktor nga kakason ang iya post, bangud kun indi, indi sini pag-sustentuhan ang ila baby.
“@diegoloyzaga said if I don’t take down the post, he won’t provide for my daughter daw. ok boy bye.”
Wala pa sang official statement si Loyzaga apang may nagaguluwa nga Instagram stories kun sa diin ginsabat sini ang amo nga isyu.
Lakip diri ang:
“I never said I wouldn’t provide?? Why would you say that in your post?!? You lying to everyone!!!”
“Again, not denying anything else, but my baby will be taken care of definitely.”
Na-delete na subong ang nasambit nga Instagram stories kag ang screenshots sini sa iya conversation kay Suapengco.
Ang nabilin na lamang sa story sa profile sang aktor amo ang album art sang “Trouble in Paradise” ni Ty Thom kag may “sad” emoji.
Hunyo 2023 sang ginsapubliko ni Loyzaga nga isa na siya ka amay apang wala sang detalye kun sin-o ang iloy sang bata.
Sang damlag lamang, may interview kay Loyzaga kun sa diin gin-ako sini nga nagsulod siya sa rehab kag naglawig sang 14 ka bulan sang 2018 bangud sa iya nga “psychological way of thinking,” “suicidal” thoughts, kag “substances I was taking.”#
