Arestado ang isa ka anak sa Janiuay, Iloilo matapos ginlabo-patay ang iya kaugalingon nga amay.
Ang biktima amo si Adan Diosino, 56, isa ka tricycle driver samtang ang suspek naman amo ang soltero sini nga bata nga si Daryl, 27, isa ka vendor, lunsay residente sang Barangay Matag-ub sa amo nga banwa.
Sa interview sang Bombo Radyo kay Police Captain Alwin Salmon, hepe sang Janiuay Municipal Police Station, iya ginpahayag nga ginsaway sang bata ang iya amay bangud hubog ini kag nagapangsita sa iban nga mga tawo sa palibot.
Ginklaro sang hepe nga sang amo nga tion, biktima lamang ang hubog — indi ang suspek.
Wala nagpamati ang amay suno kay Salmon kag padayon ini sa iya aktwasyon, rason nga sang ulihi, nagpamikon na ang bata tubtub nga nakakuha sang binangon kag ginlabo ang biktima.
Naigu ang amay sa wala nga bahin sang iya ulo nga rason sang iya kamatayon.
Ginahulat sang Janiuay Municipal Police Station ang plano sang pamilya kun may ipasaka nga kaso batok sa suspek. #
