Nahatagan sang daku nga oportunidad ang Filipino K-pop boy band nga Hori7on nga maka-perform sa opening ceremonies sang 2024 Winter Youth Olympics sa Gangwon province sa South Korea sa Byernes, Enero 19.
Ang banda ang ginabug-usan nanday Vinci Malizon, Kim Ng, Kyler Chua, Reyster Yton, Winston Pineda, Jeromy Batac kag Marcus Cabais.
Suno sa International Olympic Committee, sa amo nga event, pangunahan sang Korean singer nga si Taeyon ang lista sang performers.
Patigayunon ang opening events sang quadrennial meet sa PyeongChang Dome kag sa Gangneung Oval nga amo man ang gingamit sang 2018 Winter Olympics.
Magalibot ang kahiwatan sa tema nga ‘The Universe’ nga naga-simbolo sang madamo nga posibilidad para sa mga kabataan.
Nahibaluan na tatlo ka mga Pinoy athletes ang magapakigbahin sa Winter Youth Olympic Games lakip ang speed skater nga si Peter Groseclose, freestyle skier nga si Laetaz Amihan Rabe, kag cross-country skier nga si Avery Balbanida.#
