Nagbubo ang mensahe sang kasubo sa National Basketball Association (NBA) kasunod sang kamatayon sang 46-anyos nga assistant coach sang Golden State Warriors nga si Dejan Milojevic.
Suno sa Warriors, nagsuprer si Milojevic sang heart attack kadungan sang pibado nga dinner sang team kag apisar gindalagan man ini gilayon sa ospital sa Salt Lake City, Utah, wala na ini natabangan pa.
Yara na kuntani ini sa iya ikatatlo nga season bilang assistant coach sa Golden State matapos ginbuligan ang amo man nga team nga makuha ang kampyonato sang 2022.
Antes ang kumpirmasyon halin sa Warriors, una na nga gin-anunsyo sang NBA nga wala nadayon ang hampang sang Warriors batok sa Utah Jazz bangud sa medical emergency sa kampo sang Golden State.
Antes nagsulod sa Warriors, nangin head coach si Milojevic sang 2021 season sa Buducnost sa Adriatic League sa Montenegro.
Sa sulod sang walo ka season, nangin head coach man siya sang Mega Basket sa Belgrade, Serbia nga amo man ang nasyon nga iya ginhalinan.
Sang Disyembre 2019, nangin assistant coach man siya sang Serbian national team.
Nakaangkon man ini sang 14 ka tuig nga international playing career kag nahingadlan anay nga Adriatic League Most Valuable Player sa sulod sang tatlo ka tuig (2004-2006).#
