Lain ang gahum sang gugma — ano man nga tion kag bisan diin man nga lugar, may ginahimo gid ini nga mahika.
Kaangay sang magkahagugma sa Gaza nga pareho nga nagtalal-as sa ila nga lugar sa Palestine sang nagtimalos na ang Israel kag naglunsar sang aistrikes bangud sa kaakig sini sa ginhimo sang Hamas militants sang Oktubre 7.
Sang amo nga tion, naguba gid ang balay ni Mohammed al-Ghandour kag sang iya nobya nga si Shahad.
Nadulaan man sila sang mga pinalangga sa kabuhi kag sang amo nga tion, daw sigurado na gid nga indi na madayon ang ila ginahandum nga kasal.
Lakip sila sa ginpunsok sa “tent city” ukon ang lugar sa Rafah sa southern nga bahin sang Gaza malapit sa Egypt kun sa diin linibo ka mga tents ang naka-plastar nga amo ang puluy-an sang mga tawo sa sulod na sang binulan nga gyera.
Bisan amo sini ang sitwasyon, gintinguhaan gid ni Ghandour nga makasal sila ni Shahad.
Sa bulig sang ila pamilya, nadekorahan sang lights ang tent kag ginpasuukan man ang bride sang puti nga bayo nga disente para sa kasal.
Sa sulod man mismo sang tent ginpasuksokan sang singsing ang bride nga amo ang tanda sang ila paghigugma nga wala sang katapusan.
Nagpanguna man ang iloy ni Shahad sa mga babayi nga nag-selebrar sang ila kasal kag may yara man sang nag-kinot sang ila batteries agud nga may yara sila sang gamiton para sa gamay nga portable music player.
Limitado ang pagkaon sa amo nga lugar gani kuntento na ang bride kag groom sa snaks nga nakabutang sa plastic nga nakaplastar sa sulod sang tent.
“We are a people that love life, despite death, murders and destruction,” suno kay Mohamed Jibril nga amay sang bride.
Samtang may gamay nga wedding party kag may matunog nga nagapalakpak, padayon naman ang iban nga mga tawo sa kaiping nga tents sa ila nga mga ulubrahon kaangay sang pagpangita sang pagkaon kag pagpanglaba.
Gin-ako sang groom nga kasunod sang mga hitabo sa gyera, halos tres porsyento lang gid ang iya kalipay nga nabatyagan apang luyag gid sini nga mangin malipayon ang iya asawa rason nga gindayon ang kasal.
Nahibaluan nga sandig sa data sa Paletinian health authorities, lapaw na sa 24,700 ang napatay sa Gaza halin sang naglunsar ang Israel sang airstrikes bilang balos sa Hamas militants nga amo ang nagpatay sang masobra man 1,200 ka tawo sa southern Israel.# (AFP)
